犯眾憎專屬嘅Farewell Party

犯眾憎專屬嘅Farewell Party

犯眾憎專屬嘅Farewell Party

乞人憎嘅同事,梗有一個喺左近。但係當乞人憎嘅同事要離職嘅時候,無人同佢搞Farewell,嗰位同事一定好難受。所以日本關西有間好貼心嘅連鎖餐廳「ごちそう村」今年推出咗「單人送別會」套餐 。呢個套餐犀利喇,除咗有得食好西之餘,最正嘅係舖頭嘅員工會扮你嘅同事,為你獻花送心意咭,同你飲杯,仲會喺甜品上面寫字句感謝你勞苦功高添!全個套餐盛惠四至五千円(即係HK$280 – HK$350左右),對於一眾無朋友嘅同事嚟講直頭係超值呀!

呢啲橋真係只有日本仔先諗得出。可能因為佢哋工作上面太多政治同等級制度,令到一眾打工仔好難喺職場上面搵到朋友。無錯係幾有新意嘅,但係唔知有幾多人真係會幫襯呢?幫襯嘅人其實都幾孤「毒」。不過,可能要面嘅日本大男人唔想比屋企人知佢無人同佢Farewell,所以會買呢個套餐呃啲相、花同心意咭返去同老婆仔女交待都唔定。陰公,真係用心良苦呀!幫襯完記住唔好唔小心帶咗啲屋企人返去間餐廳食飯呀。一陣阿仔問「點解爸爸你啲舊同事全部轉晒嚟呢間餐廳做嘅?」,到時你都唔知嬲好定笑好!

計我話,與其要幫襯食呢個專屬套餐,不如早啲同同事建立下良好關係,有時蝕底少少咪當豪比佢囉!點都好過活喺虛擬世界,自費搞個假Farewell啦!

2019-04-23T14:47:38+00:00