打工仔最需要嘅Coffee Nap

打工仔最需要嘅Coffee Nap

打工仔最需要嘅Coffee Nap

陳豪話咖啡係種享受,我阿媽話生完我之後唔駛返工,有得瞓幾個鐘晏覺先係至高嘅享受。但英國拉夫堡大學同日本嘅科學家不約而同地發現,咖啡小睡(Coffee Nap)先係皇道。因為Coffee Nap可以令你精神到老虎都打死幾隻。

咖啡提神呢個事實就3歲嘅小朋友都知。但係提完神先嚟瞓覺係咩玩法?原來飲完咖啡之後,咖啡因需要大概20分鐘先會去到個腦,比稱為腺苷的分子充當受體吸收。當大腦積聚好多腺苷嘅時候,我哋就會容易覺得攰,而咖啡因嘅作用就係阻斷呢啲受體,令我哋暫時無攰嘅感覺。

人喺瞓覺嘅時候,身體會自行清除大腦入面嘅腺苷。所以當我哋一飲完咖啡即刻眠一眠15-20分鐘嘅話,咖啡因就會啱啱到達大腦,並且係一個腺苷水平已經降低咗嘅大腦。咁樣,咖啡就可以更加有效咁發揮佢嘅作用,更徹底咁清除剩低嘅腺苷。就係咁樣雙管齊下,就令人嘅睡意降下,工作就更有效率啦。

實在喺英國同日本分別都有研究去證實咗Coffee Nap堅有效呢!咖啡大牌子雀巢仲喺東京開咗間「Nescafe 睡眠咖啡館」比無覺好瞓嘅人體驗吓瞓場好覺嘅滋味!瞓15分鐘輕睡又得,熟睡瞓足3個鐘亦得!聽講張床嘅軟硬程度仲有得選擇添噃。

而加就等小編同你分享下喺公司Coffee Nap嘅tips啦!

  1. 最緊要記得較鬧鐘。15-20分鐘都得。因為你一唔小心瞓多過20分鐘,就會進入熟睡狀態,到時就有反效果咖喇!
  2. 搵個舒服嘅位置等自己可以真係休息到(例如book個細conference room扮開會)。
  3. 記住你得20分鐘時間呀!所以飲完咖啡即瞓係關鍵,唔好飲飲下又去check email或者睇IG呀!數下綿羊就差唔多!
  4. 飲完咖啡,請立刻盡快進入睡眠狀態。
  5. 起身嘅時候,雖然你精神過蔡英文,但都請你記得去廁所check下自己有無口水蹟;啲頭髮有無亂;同埋個妝有無溶呀!嚇親隔嚟位同事就唔好啦。
  6. 如果你唔喜歡咖啡嘅,飲茶或者紅牛都得咖!
2019-05-02T18:54:20+00:00