打工仔慳錢大法，拒做月光族

成日唔知份糧用咗去邊？儲極都儲唔到錢？唔想做月光族就一齊學下點慳錢啦！

建立正確儲蓄觀念：收入-儲蓄＝開支而不是收入-開支＝儲蓄

先儲錢後洗錢呢個觀念好重要。要做到呢樣野可以喺出糧戶口設立自動轉帳，出糧之後先將一定嘅金額轉到儲蓄戶口，一出糧先儲錢後洗錢。如果只係將洗剩嘅錢先儲底，好可能到最後都儲唔到錢。

多用現金、少用信用卡

用信用卡好容易失預算，一個唔小心用晒今個月份糧，可能仲會用埋下個月個份。如果每個月出糧第一件事就係還卡數，呢個惡性循環真係好陰公。要脫離呢個先洗未來錢嘅習慣，先可以更容易儲到錢。洗幾多就帶幾多現金出街，咁就唔怕洗多左啦。

建立記帳習慣

記低所有使費，就可以了解自己嘅消費習慣，知道有咩洗多左，對証下藥，就可以調整花費啦。

建立購物清單

帶購物清單購物可以確保洗費都係預算之內，諗清楚咩係需要咩係想要，做個精明消費者，就唔怕買下買下又買多左。

帶飯返工

出去食個午餐要用$50-$100不等，視乎你返邊區。當你一個月返工20日，如果日日帶飯都慳到$1000-$2000。

自己沖咖啡

出去買一杯咖啡$40-$50，但係買一樽咖啡粉都只係幾十到百幾蚊不等，一個月自己沖咖啡就可以慳$800-$1000啦。

約朋友響屋企睇Netflix

睇Netflix一個月任睇都係百幾蚊，去戲院睇一場戲就己經百幾蚊，再順便買少少野食野飲又加多幾百蚊。所以安坐家中睇戲一個月又慳到一千幾百啦。